گؤيه ميللَنميش چرپلنگ، یوخسا پاليچيغا اوتورموش گمی / ایواز طاها

اکتبر 25, 2007 در 2:20 ق.ظ. | نوشته شده در دوشونجه و فلسفه | بیان دیدگاه

گله­نه­ک، اولدوقجا بوروشوق بير مسئله­دير. گله­نک اولمادان هر شئي آنلاميني ايتيره بيلر. گله‌نه­يين چکيسيندن [جاذبه­سيندن] ايراقدا ياشاماق، هاواسيز نفس آلماق کيمي چتين گلير آداما: هئچ‌واخت تجروبه اولونماياجاق بير دوروم. آمما قيسمن ده اولسا سيز بونو آذربايجان جومهورييتينده (سووئت­لر بيرليييندن قالما باشقا جومهورييت­لر کيمي) دويورسونوز. آنلاييرام، گله‌نک‌سيز هئچ بير توپلوم يوخ­دور. بيز توپلومدان و تاريخدن قازانديغيميز تجروبه­لره داياناراق ايره­لي گئديريک. بو تجروبه بيزيم داورانيش­لاريميزي گئنيش اؤلچوده کُدلاشديرير. آنجاق مارکسيزمين آذربايجان توپلوموندا اوغورلاريندان بيريني، بو تاريخي يادداشين پوزولماسي کيمي وورغولاماق اولار.

گله‌نک باجاسيندان باخاندا بونلاري گؤروروک: باکي، يونگوللوکدن گؤيه ميللَنميش چرپلنگه [بادبادکه] اوخشايير، تبريز ايسه آغيرليقدان پاليچيغا اوتورموش گمي‌يه. قوزئيده آسقيراق گليرکن ساغلامليق دئمک، قاپي کانداريندا [آستاناسيندا] گؤروشمکدن چکينمک، گونون فالينا دريندن اينانماق آلداتماسين بيزي. بونلارين گله‌نه‌يه دخلي يوخ‌د‌ور، روس کومونيزمي­نين تالاديغي ديني آيين­لرين يئرينده اوتورموش دئفورمه آيين­لردير بونلار. سونوج آيدين‌دير: قوزئيده گله‌نک بوشلوغو نه­ قده­ر کي يئني دوشونجه­لره يول آچير، بير او قده­ر هر نه‌يي آنلام­سيزلاشديرير. مدرنيزم گله‌نه‌يين ايشيغيندا يئني‌دير. بونو دا دئييم کي، من مدرنيزمي، باکي فانتا باغيندا مئيوه شيره­لري­نين کوکاکولايا يئنيلمه­سي، و کلم‌دولماسي‌نين مکدونالد همبرگرلري ايله عوض اولونماسي کيمي باشا دوشمورم. اولا بيلسين بونلار پُست­مدرن فئنومئن­لردير!

بو تايدا ايسه گله­نک، اوجو ايتميش يوماق کيمي تکجه ال­آياغيميزا ساريلمير، بئينيمزه دولاشير. بيزده هر بير يئني دوشونجه، هر بير يئني ايجتيماعي آخيم، و هر بير يئني فئنومئن، واختيندان اؤنجه اؤلوشگه­يير. بونلار، دونيوي [عرفي] و فقهي مانعه­لرين ايچيندن کئچه­کئچه يئني اؤزه­لليک‌لريني ايتيرير. يئني­ليک، واختلي­واختيندا يئنيليک­دير، واختي اؤتورسه باياغي­لاشير. فتوآپارت [عکاسي دوربين] گلير، اونا قارشي چيخيريق، سينما گلير يئنه بئله اولور، ويدئو گلير يئنه بئله اولور، کروزنا چاناغي [ماهواره آنتني] دا بئله. سونرا ايل­لر بويو موباريزه آپارديقدان سونرا اونلارين دَبدن دوشدويو بير واختدا اونلارلا راضيلاشيريق. اوشاقليقدا اويونجاق­لارلا دويونجا اويناماميش اوشاق، قوجالينجا اونلارلا اويناماقدان لذذت آلير. گوج مسئله­سي ده بئله‌دير. بير طرفده گوجون قاتي فورماسيلا، او بيري طرفده ايسه ايلکين قورولوشو ايله قارشي قارشيياييق. بونلارين هر ايکيسي ده گله­نک حاققيندا دئدييم او اؤزه­لليک­لرله اوست‌اوسته دوشور.

ماراقلي بودورکي، هئچ کيم کئچميشيندن تام قوپا بيلمير. گله­نک ایسه تک­آنلاملي بير دئييم دئييل. اولدوقجا بوروشوق، چوخ­آنلاملي، اوست­اوسته قالانميش قات­قات تجروبه‌لردن اولوشان بير فئنومئن­‌دير. بعضن گله‌جه یه ایشیق سالان بیر فئنومئن. پول ريکورون دئدييينه گؤره، «بيز کوتله­نين کئچميش يادداشيني [حافيظه­سيني] اونلارا قايتارديقدا گله­جه­يي ده اونلارا تاپشيريريق. اونلاري يئني­دن زامانين آخارينا قايتاريريق.» زامان سووئت دؤنمينده دايانميشدي. سووئت حؤکومتي طبقه­سيز بير توپلوم ياراتماق ديله­يي ايله، تاريخين ديشيندا حرکت ائديردي. باخين! باکيدا ايندي کوتله، «آن»­لاردا ياشايير، نه کئچميشله يئترينجه ماراقلانير، نه ده گله­جک­له ايشي وار. اونون گله­جه­يه ماراغيني تکجه بئله يوزماق اولار: ائرته­سي گون قازاناجاغيني بو گون خرجله­يير. بونون بير آنلامي دا کئچميشين ابدي کئچديييني گومان ائتمک­دير، گله­جه­يين ده گلمه­يه­جه­ييني. حالبوکي کئچميش هئچواخت کئچيب گئتمير، و بيزيم کيمليييميز کئچميشي «تاريخ و تحکيه [داستان]» دونوندا نئجه روايت ائتمه­يييميزدن آسيلي­دير. تاريخ و تحکيه بيزيم کيمليييميزي اولوشدورور، روايت ايسه يالنيز ديلده گئرچکلشير. بوردا البته ديل بيزيم داديمزا چاتا بيلردي، چاتمير. چونکو بوتايدا گله­نک وارسا ديل يوخدور؛ اوتايدا ايسه ديل وارسا گله­نک يوخدور.

قایناق

Advertisements

نوشتن دیدگاه »

RSS feed for comments on this post. TrackBack URI

پاسخی بگذارید

در پایین مشخصات خود را پر کنید یا برای ورود روی شمایل‌ها کلیک نمایید:

نشان‌وارهٔ وردپرس.کام

شما در حال بیان دیدگاه با حساب کاربری WordPress.com خود هستید. بیرون رفتن /  تغییر دادن )

عکس گوگل+

شما در حال بیان دیدگاه با حساب کاربری Google+ خود هستید. بیرون رفتن /  تغییر دادن )

تصویر توییتر

شما در حال بیان دیدگاه با حساب کاربری Twitter خود هستید. بیرون رفتن /  تغییر دادن )

عکس فیسبوک

شما در حال بیان دیدگاه با حساب کاربری Facebook خود هستید. بیرون رفتن /  تغییر دادن )

درحال اتصال به %s

ساخت یک وب‌گاه یا وب‌نوشت رایگان در وردپرس.کام.
Entries و دیدگاه‌ها feeds.

%d وب‌نوشت‌نویس این را دوست دارند: